ਵਾਢੀ ਦਾ ਛੰਦ

ਕਣਕਾਂ ਨੇ ਪੱਕੀਆਂ,ਅੱਖਾਂ ਸੀ ਥੱਕੀਆਂ,
ਵਾਢੀ ਦੇ ਟੈਮ,ਹੋਗੇ ਜੱਟ ਕੈਮ,
ਲਾਉਣ ਮਸ਼ੀਨਾਂ,ਵੈਸਾਖ ਮਹੀਨਾਂ,
ਵਾਢੀਆਂ ਆਈਆਂ,

ਵਾਢੀ ਦਾ ਜੋਰ,ਛੱਡੇ ਕੰਮ ਹੋਰ
ਦੁੱਖ ਦੇ ਗੋਡੇ,ਨਾਂ ਮਿਲਦੇ ਡੋਡੇ
ਬਿੰਦ ਨਾਂ ਸੌਂਦੇ ,ਅਮਲੀ ਨੇ ਰੋਂਦੇ,
ਦੇਣ ਦੁਹਾਈਆਂ

ਵੇਖ ਸਾਹ ਸੁੱਕਦੇ,ਨਾਂ ਰੋਕਿਆਂ ਰੁਕਦੇ
ਬੱਦਲ ਜਦੋਂ ਚੜਦੇ,ਕਾਲਜੇ ਕੱੜਦੇ
ਮੀਂਹ ਤੋਂ ਡਰਦੇ,ਕਾਹਲ ਨੇ ਕਰਦੇ
ਕੇਹੋਜੇ ਦਿਨ ਆਏ

ਲੈ ਕਾਲਜੋਂ ਛੁੱਟੀਆਂ,ਕਿਤਾਬਾਂ ਸੁੱਟੀਆਂ
ਪਾਹੜੇ ਪੁੱਤ ਆਗੇ,ਖੇਤਾਂ ਚ ਛਾਗੇ
ਟਰੈਟ ਚਲਾਉਂਦੇ,ਗੇੜੇ ਆ ਲਾਉਂਦੇ
ਖੇਤਾਂ ਦੇ ਜਾਏ

ਸਿਰਾਂ ਨੂੰ ਆਉਂਦੇ,ਟਰਾਲੀਆਂ ਲਿਆਉਂਦੇ
ਵੱਟਾਂ ਨਾਂ ਵੱਡਦੇ,ਲੀਹਾਂ ਨੇ ਚੜਦੇ
ਟਰੈਟ ਨੇ ਤਕੜੇ,ਟੁੱਟੇ ਨੇ ਸ਼ਕੜੇ
ਔਖੀਆਂ ਬਹੁਤ ਕਮਾਈਆਂ

ਵਾਹਣ ਨੇ ਸਿਲ੍ਹੇ,ਨਾੜ ਨੇ ਗਿਲੇ
ਦੋ ਸੌ ਮਣ ਭਰੀਆਂ,ਵਾਹਣਾਂ ਚ ਖੜੀਆਂ
ਸੰਗਲ ਨੇ ਲਿਉਂਦੇ,ਟੋਚਣ ਨੇ ਪਾਉਂਦੇ
ਟਰਾਲੇ ਨੇ ਵੱਡੇ,ਟਰੈਟ ਕਿਥੋਂ ਕੱਡੇ
ਦਾਬਾਂ ਨੇ ਪਾਈਆਂ

ਰੱਖੀ ਸੀ ਆਸ,ਮਿਲਣ ਨਾਂ ਪਾਸ,
ਟਰਾਲੀਆਂ ਨੇ ਖੜੀਆਂ,ਪਈਆਂ ਨੇ ਅੜੀਆਂ
ਲਾ ਲਾ ਜਿੱਕ, ਛੱਡੇ ਆ ਡਿੱਕ
ਟੈਰ ਨੇ ਮਾੜੇ

ਤੂੜੀ ਦੀਆਂ ਪੰਡਾਂ,ਦਿੰਦੇ ਆ ਗੰਡਾਂ
ਪੈਣ ਹੁਣ ਰਾਤਾਂ,ਭਰਨ ਸਵਾਤਾਂ
ਧੂੜ ਜੀ ਚੜਦੀ,ਕੰਡ ਵੀ ਲੜਦੀ
ਧੁੱਪ ਵੀ ਰਾੜੇ

ਗੁੜਦੇ ਨਾਲ ਪਤਾਸੇ,ਮਾਰੇ ਆ ਮੜਾਸੇ
ਪੀਂਦੇ ਆ ਚਾਹਾਂ,ਗਰਦ ਵਿਚ ਸਾਹਾਂ
ਤੰਗਲੀਆਂ ਫੜੀਆਂ,ਧੂੜਾਂ ਨੇ ਚੜੀਆਂ
ਖਾਂਦੇ ਨੇ ਹੱਕਦਾ

ਮੰਡੀਆਂ ਚ ਦਾਣੇ,ਢੋਏ ਆ ਜਾਣੇ
ਲਿਵਟਾਂ ਨੇ ਚੱਕਦੇ,ਧੂੜਾਂ ਚੋਂ ਤੱਕਦੇ
ਬੈਠੇ ਆ ਬਾਬੇ,ਮਾਰ ਦੇ ਦਾਬੇ
ਜੇ ਦਾਣੇ ਕੋਈ ਚੱਕਦਾ

ਗੇੜੇ ਕੱਡਦੇ ਲਾਲੇ,ਧੁੱਪ ਚ ਕਾਲੇ
ਗਰਮੀ ਨਾਂ ਝੱਲਦੇ,ਮੂੰਹ ਜੇ ਮਲਦੇ,
ਚੱਕਮੇਂ ਪੈਂਰੀ ਆਉਂਦੇ,ਗੱਲ ਨੇ ਸਮਝਾਉਂਦੇ
ਸਾਹਬ ਰਹਿਣ ਕਰਦੇ

ਬਣਾਤੇ ਬੋਹਲ,ਲੱਗਦੇ ਨੇ ਤੋਲ
ਪੱਖੇ ਨੇ ਚੱਲਦੇ,ਘੁੰਡੀਆਂ ਨੇ ਮਲਦੇ,
ਲਾਉਂਦੇ ਨੇ ਮਾਂਜੇ, ਪਿੜਾਂ ਦੇ ਸਾਂਝੇ
ਜੁੜ ਜੁੜ ਬਹਿੰਦੇ

ਆਏ ਘਰੇ ਦਾਣੇ,ਖਿਲਾਰਣੇ ਨਿਆਣੇ
ਗੱਟੇ ਨੀਂ ਸਰਨੇ,ਡਰੰਮ ਵੀ ਭਰਨੇ,
ਬੱਠਲ ਨੇ ਭਾਰੇ,ਲੱਗੇ ਆ ਸਾਰੇ,
ਫਿਰਨ ਸਾਂਭਦੇ ਦਾਣੇ

ਚੁਗਦੇ ਬੱਲੀਆਂ,ਬੰਨ ਕੇ ਪੱਲੀਆਂ
ਦਾਤੀਆਂ ਫੜੀਆਂ,ਧੁੱਪਾਂ ਨੇ ਚੜੀਆਂ
ਲਾਉਂਦੇ ਨੇ ਫੇਰ,ਸੜਕ ਤੇ ਢੇਰ,
ਮਿਹਨਤੀ ਲਾਣੇ

ਪਾਏ ਨੇ ਚੋਲੇ,ਪਿੱਕੇ ਨੇ ਕੋਲੇ
ਬੋਰੇ ਨੇ ਵੱਡੇ,ਢਿੱਡ ਨੇ ਕੱਡੇ
ਕਾਰ ਤੇ ਸੇਵਾ,ਖਾਂਦੇ ਨੇ ਮੇਵਾ
ਵਿਹਲੇ ਸਾਧ ਪਾਖੰਡੀ

ਭਲਾ ਮੰਗ ਸੱਭਦਾ,ਪਤਾਂ ਨੀਂ ਰੱਬਦਾ
ਠੱਗੀਆਂ ਚ “ਲੱਖਿਆ”,ਕੁਝ ਨੀਂ ਰੱਖਿਆ
ਦੱਬਕੇ ਵਾਹ ਲਾ,ਰੱਜਕੇ ਖਾ ਲਾ
ਕਦੇ ਨੀੰ ਥੁੜਦਾ।
‘🖋🖋 ਲੱਖਾ .™